سباق التتابع الثوري


بعد ما صار عمر الثورة السورية 6 أشهر ونحن عم نقول هالجمعة بنخلص من هالنظام الحقير وع رمضان بركي بيسقط النظام وبنعيّد مع رئيس جديد والأمل عم ياخدنا من يوم ليوم ومن جمعة لجمعة وخلص رمضان والوضع على ما هو عليه.. النظام باحت الدبابات ع مد المحافظات وما في شي عم يردعو وكلمالو عم يجن اكتر وأكتر والمعارضة السياسية أثبتت ورغم تاريخها المشرف بأنها أضرب من النظام بكبر الراس والعناد وعلى الرغم من العشرطعشر مؤتمر اللي انعقدوا من أنطاليا لسميراميس لأسطنبول ومحاولات تشكيل حكومة ظل ومجلس وطني انتقالي فهالمعارضين الأشاوس ما عم يعرفوا يجتمعوا بهيئة تمثل الثورة وكلما صارت محاولة توحيدية جديدة بينط كل واحد وبيقول أنا ما دخلني وما أخدوا رأيي ولا استشاروني وبتفشل المحاولة فشلاً ذريعاً وكأنهم مو شايفين أنو في شي أكبر عم يصير وأنو السوريين عم ينقتلوا بالعشرات كل يوم والوضع من سيء لأسوأ، أما المجتمع الدولي فهو حايص بوضع سوريا المفشكل فلا بديل واضح للنظام (ما عنا مجلس انتقالي متل ليبيا) والنظام ماسك بوراق متل العراق وحزب الله وجبهة الجولان وايران ومبلش يناور فيهن مع أميركا، وروسيا لساتها داعمتو ع العمياني وكل ما صار قرار ادانة بمجلس الأمن بيقولوا أنهم رح يستخدموا الفيتو ضد القرار وتركيا موقفها بين مد وجزر ويوم بيرفعوا لهجتهم ضد النظام وتاني يوم بيرجعوا معو حبايب وبيعطوه فرصة.. بظل كل هالحالة الضبابية واللي ما مبين أنو رح تنحسم قريبا، بقي الصوت الأعلى والاهم للشعب اللي مستمر بالتظاهر واللي بعد 6 أشهر لساتو عم ينزل ع الشارع بكل المدن وما عم تضعف عزيمته لا الدبابات ولا الرصاص ولا الاعتقالات.

عزيزي المندس من منزلك وأمام شاشة كمبيوترك واللي حافظ كل هتافات المظاهرات ومحروق قلبك ع دم الشهداء ونص رفقاتك صاروا بالمعتقلات.. حان وقت مشاركتك ونزلتك ع الشارع وتغلبك على خوفك، رح تقلي أنو عندك عيلة وولاد وما بينتركو.. واللي عم يشاركوا كمان عندهم وولاد وعيلة وأحبّة.. أو رح تقلي أنو لساتك عم تدرس وما ساويت شي بحياتك.. الثورة سقط فيها أطفال وشباب بعمر الورد والخوف صار مخجل قدام تضحيات اللي سبقونا.. في ناس شاركت من أول ما بلشت الثورة ولهلأ لساتها عم تطلع وانحبس مرة وتنتين وصار في خطر عليها بينما أنت اللي مو مشارك لسا ولا مرة حتى لو اعتقلت –لاسمح الله- فرح يكون وضعك أحسن بألف مرة من اللي صار الو فيشة طويلة عريضة عند المخابرات وغالبا بتطلع بعد كم يوم وبترجع لأهلك بطل.. إذا كنا بدنا نسقط النظام سلميا وبدون تدخل خارجي فلازم تزداد هالمظاهرات تدريجيا حتى نوصل لمرحلة كل الناس تنزل من الشام لحلب ومن أقصى جنوب سوريا إلى أقصى شمالها ونبلط بالساحات رجال ونساء.. شباب وختايرة.. حتى اسقاط النظام.. غير هيك ممكن الثورة مع الوقت تخمد- مع انو هالشي صار مستبعد جداً- .. بالنهاية بدي اترككم مع حلقة ظريفة من حرية وبس عن ماذا لو بقي النظام..

نشر في المندسّة السورية

  1. لا توجد تعليقات حتى الأن.
  1. 2011/08/30 عند 8:32 م

خود وعطي

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s

%d مدونون معجبون بهذه: